Лииндэ оскуолата үөрэтиигэ саҥа хайысхалары баһылыыр
Эдьигээн оройуонун Лииндэ уопсай үөрэхтээһинин орто оскуолатыгар «Арктическай кыра кыамталаах оскуола усулуобуйатыгар агропарк» диэн бырайыак ситиһиилээхтик үлэлиир. Бырайыак сүрүн соруга – «Лииндэ» диэн ааттаах агропарканы оскуола базатыгар тэрийии, оҕолору үлэ ньымаларыгар үөрэтии. Оскуола үөрэнээччилэрин барытын хабан үс хайысха үлэлиир: 1-4 кылаастар – өбүгэ төрүт дьарыктарын кытта билсэллэр; 5-7 кылаастар балыктааһын, булт, килиэккэлээх кыылы, дьиэ табатын иитии төрүттэрин үөрэтэллэр; 8-9 кылаастар бородууксуйаны оҥорон таһаарыы ньымаларын баһылыыллар. Бырайыак партнердара – оройуон дьаһалтата, тыа хаһаайыстыбатын управлениета, Лииндэ нэһилиэгин дьаһалтата, нэһилиэккэ үлэлиир чааһынай предпринимателлэр Николай Николаев, Александр Петров уонна төрөппүттэр. Лииндэ оскуолатын коллектива эдэр, үксэ олохтоох дьон. Онон эдэр киһи баар сиригэр сайдыы, кэскил баар диэн үөрэ көрөҕүн. Директора Людмила Ефимова эппитин курдук, оскуола олохтоох кадрдары үүннэрэн таһаарарга улахан болҕомтотун уурар. Биир оннук эдэр киһинэн Айсен Николаев буолар. Быйылгы үөрэх дьылыттан физукльтура уруогун үөрэтэр, Дьокуускайдааҕы педколледжка кэтэхтэн үөрэнэр. Бу иннинэ кини «Сосновый бор» республикатааҕы оҕо сынньалаҥ киинигэр эбии үөрэхтээһин педагогунан үлэлээбитэ. Бастыҥ үлэтин иһин Владивосток куоракка «Океан» Бүтүн Россиятааҕы оҕо киинигэр стажировкаланан кэлбитэ. Быйыл сайын Айсен Владимирович салайан үлэлэппит лааҕыра оройуоҥҥа иккис миэстэни ылбыт. Онон учуутал умсугутуулаах аартыгар кэккэ ситиһиилэрдээх. Музыка учуутала Снежана Руфова көҕүлээһининэн, оскуола коллектива «Музыка – барыбытыгар» бырайыакка көхтөөхтүк кыттар. Үһүс чиэппэртэн ырыаҕа анаммыт үс түһүмэхтээх үлэ саҕаланаары турар. — Үлэбит сүрүн соруга – хор тэрийии. Бастакы түһүмэххэ – эдэрдэр, иккискэ – орто саастаахтар түмсүөхтээхпит уонна үһүс түһүмэхпитигэр бары түмсэн, улахан хор тэрийиэхтээхпит. Биһиги оскуолабытыгар үс ансаамбыл үлэлиир – «Гарпанча», «Эҥнэкэн», «Болгикта». Быйыл саас ДЬокуускай куоракка Аан дойдутааҕы таһымнаах «Бриллиантовые нотки» куонкуруска ситиһиилээхтик кыттан кэлбиппит. Билигин олунньу ыйга ыытыллыахтаах «Аюкта» оройуоннааҕы фестивальга бэлэмнэнэбит, — диэн кэпсиир кини. Лииндэ оскуолатыгар эбэҥки төрүт культуратын сөргүтүүгэ, үүнэр ыччакка иҥэриигэ улахан болҕомто ууруллар. Үһүс кылаас учуутала Аида Валерьевна Обулахова кылааһын стиэндэтэ барыта эбэҥкилии ис хоһоонноох. «Сорох дьон көрөн баран, хайа, сыыһа суруйбуккут дии диэн соһуйаллар. Ону ити эбэҥкилии суруллан турар диэн оҕолорбутун кытта быһааран биэрэбит, — диэн кэпсиир алын кылаас учуутала Аида Обулахова. Лииндэ оскуолатыгар үөрэх таһынан оҕо интэриэһин барытын хабан, араас курһуоктар үлэлииллэр. Быйылгыттан ыла саха тылын уонна литературатын учуутала Яна Корякина «Айар куорсун» диэн куруһуогу үлэлэтэр. Оҕолор «Чуораан» диэн ааттаах оскуодла сонунун кэпсиир хаһыаты ыйга биирдэ таһаараллар. Бу күннэргэ куруһуок оҕолоро «Лииндэ» юнкорпост диэн ааттанан «Кэскил» хаһыат иһинэн «Бэргэн» республикатааҕы оҕо прессатын агенствотыгар регистрацияланнылар.
