Мэҥэ Хаҥаласка сэллиги утары охсуһар диспансер 75 сылыгар кинигэ сүрэхтэннэ
Ахсынньы 15 күнүгэр улууска сэллиги утары охсуһар диспансер 75 сыла бэлиэтэнэринэн Р.Г.Васильев аатынан кыраайы үөрэтэр мусуойга научнай-практическай кэмпириэнсийэ тэрилиннэ. Үбүлүөйдээх күн диспансер дьиэтигэр биир идэлээхтэрэ оройуоҥҥа сэллиги утары охсуһууга 50-ча сыл үлэлээбит, диспансер сайдыытыгар улахан кылаатын киллэрбит РСФСР уонна Саха АССР үтүөлээх бырааһа Фекла Пивовароваҕа анаммыт мемориальнай дуосканы арыйдылар. Улуустааҕы киин балыыһа кэлэктиибин аатыттан Үлэҕэ Албан аат мусуойун матырыйаалларын улуустааҕы кыраайы үөрэтэр мусуой пуондатыгар туттарыы үөрүүлээх түгэнэ бэлиэтэннэ. Мусуой матырыйаалларын түмпүт Евдокия Борисова уонна улуус кылаабынай бырааһа Алексей Павлов, кыраайы үөрэтэр мусуой аатыттан Зоя Шарина, Нина Никанорова үйэтитиигэ үлэлэспиттэргэ хардарыта махтал тылларын эттилэр. Кэмпириэнсийэҕэ «Фтизиатрия» научнай киин дириэктэрэ Александр Кравченко, оройуон баһылыгын социальнай боппуруостарга солбуйааччы Иван Птицын, улуус кылаабынай бырааһа Алексей Павлов кыттыыны ылан эҕэрдэлээтилэр. Өрөспүүбүлүкэ улуустарыттан кэлбит доруобуйа харыстабылын үлэһиттэрэ, фтизиатр быраастар сэллиги утары охсуһуу билиҥҥи балаһыанньатын кытта билистилэр. Александр Федорович Россияҕа уонна өрөспүүбүлүкэҕэ сэллиги эмтээһин кэлиҥҥи сылларга былааннаахтык ыытылларын, биһиги өрөспүүбүлүкэбит фтизиатрдара Россия атын регионнарыттан хайдах хорутуулаахтык үлэлииллэрин тэҥнээн көрдө, ол да буоллар уодаһыннаах ыарыынан ыалдьааччы ахсаана эбиллэ турара олох-дьаһах балаһыанньатыттан тутулуктаммытын бэлиэтээтэ. Кэмпириэнсийэҕэ СӨ Доруобуйа харыстабылыгар министиэристибэтиттэн штаты таһынан фтизиатр Евдокия Лугинова оҕолорго сэллигинэн ыалдьыы кыһалҕаларын, «Фтизиатрия» научнай киин диспансерга салаатын сэбиэдиссэйэ Людмила Яковлева өрөспүүбүлүкэҕэ сэллиги утары охсуһуу диспансерынан үлэтин, улуус кылаабынай бырааһа Алексей Павлов улууска сэллиги утары охсуһуу хайдах ыытылларын иһитиннэрдилэр. Баар чахчыларга олоҕуран биһиги улууспут фтизиатрдара бастыҥнар кэккэлэригэр сылдьалларын бэлиэтээтилэр. 1 из 4 Диспансер 75 сыллаах үбүлүөйүнэн фтизиатр-быраас Евдокия Борисова оройуон баһылыгын чаһылаах грамотатынан, бактериолог-быраас Зоя Аргунова «Улууска доруобуйа харыстабылын сайдыытыгар кылаатын иһин», фтизиопедиатр Наталья Осипова оройуон дьаһалтатыттан «Оройуон иннигэр үтүөлэрин иһи» бэлиэнэн наҕараадаланнылар. Тэрээһин иккис аҥарыгар Фекла Павловна Пивоварова олоҕун, үлэтин-хамнаһын кэпсиир «Дьоҥҥо анаммыт олох» кинигэ сүрэхтэниитэ буолан ааста. Кинигэни СӨ үтүөлээх бырааһа, доруобуйа харыстабылыгар туйгуна Евдокия Борисова хомуйан оҥордо. «Якутия» медиа-холдиҥҥа кинигэ кыһатыгар «Верные клятве Гиппократа» диэн сиэрийэнэн аан бастаан бэчээттэннэ. Кинигэ туһунан билиһиннэриини бибилэтиэкэр идэлээх педагогическай үлэ бэтэрээнэ, кыраайы үөрэтээччи Софья Дмитриева оҥордо. Саҥа кинигэ киэҥ ис хоһоонноох. Ол курдук улахан суолтатынан өрөспүүбүлүкэ суолталаах хаартыскалар, сэллиги утары охсуһуу чахчылара, үлэһиттэр ахтыылара, Фекла Павловна бэйэтин ыстатыйалара түмүллүбүттэр. Кинигэ сүрэхтэниитигэр Маттаҕа оҕо сэллигин эмтиир лесной оскуолаҕа учууталынан үлэлээбит Егор Захаров бэрт интэриэһинэй ахтыыны оҥордо. Фекла Павловна дьиэ кэргэнэ, уолаттара Николай, Сергей Пивоваровтар оҕолорунаан, сиэннэринээн кэлэн ыалдьыттаатылар. Фекла, Татьяна Никаноровалар, Иван Аргунов, Роман Плотников эҕэрдэ ырыаларын бэлэхтээтилэр. Бу күн мусуойга Ф.К.Пивоварова үлэтин-хамнаһын, доруобуйа харыстабылын устуоруйатын көрдөрөр быыстапка туруорулунна.
