Үүнүү-сайдыы аартыгын арыйбыт Дьабыыл оскуолата 95 сылын туолла
Мэҥэ Хаҥалас улууһун Дьабыыл нэһилиэгэр уруккуну билиҥҥини ситимниир, инникини ыралыыр оскуола үбүлүөйэ буолла. Бу күн сарсыарда эрдэттэн оҕо саас биһигэ буолбут кыһабытыгар ыраахтан-чугастан дьон-сэргэ үөрэ-көтө муһунна. Сүргэлэрэ көтөҕүллүбүт, ахтылҕаннаах көрсүһүүттэн дуоһуйбут араас сыллар выпускниктара кылаастарга тарҕаһан иһирэх кэпсэтииттэн бырааһынньык күнүн саҕалаатылар. Ол кэннэ үбүлүөйдээх оскуолабыт үөрүүлээх чааһын дириэктэр Любовь Кычкина эҕэрдэ тылынан аста. Бу кэмҥэ ыалдьыттарга анаан сценаҕа оскуола историятын көрдөрө турбуттара, агитбиригээдэ эҕэрдэ монтааһа оҕо-саас кэрэ кэмнэрин санатта. Салгыы ытыс тыаһыгар доҕуһуоллатан, оскуола аҕам саастаах көлүөнэтигэр (1948-1957 сс) эҕэрдэни кытта тыыннаах сибэкки дьөрбөтүн туттарыы соһуччу ураты бэлэҕинэн буолла. Долгутуулаах чаас итинэн муҥурдаммата, араас сылларга үлэлээбит сатабыллаах дириэктэрдэри, күндү учууталлары, үлэлээбит эдэр көлүөнэ коллегалары уруйдааһын, барыларыгар тыыннаах сибэккилэри туттарыы бэйэтэ туспа кэрэ эйгэни үөскэттэ. Маныаха биир саамай умнуллубат уонна долгутуулаах түгэнинэн, урут үлэлээбит ытык мааны учууталларбыт барахсаттар тыыннаах бэйэлэрэ субу көстөр видеосюжеттара саалаҕа толору мустубут дьону барыбытын уйадыта долгутта. Үөрүүлээх күнүнэн Ил Түмэн дьокутаата, СР норуот хаһаайыстыбатын үтүөлээх үлэһитэ, СР тыа хаһаайыстыбатын туйгуна Дмитрий Саввин, улуустааҕы үөрэх управлениетын начаалынньыгын солбуйааччы Николай Тарасов, улуустааҕы тыа хаһаайыстыбатын управлениетын начаалынньыга Иван Аргунов, СР агрооскуолалар сойуустарын бэрэстэбиитэллэрэ, улуус оскуолаларын дириэктэрдэрэ уо.д.а. эҕэрдэлээтилэр. Онтон оскуола кэллэктиибэ кыһаларын иитэр-үөрэтэр үлэтэ, материальнай базата сайдарыгар быһаччы күүс-көмө буолар попечителлэргэ махталын тиэртэ. Араас сыллардааҕы выпускниктар улаханнык уйадыйан, үөрэн туран эҕэрдэ эриэккэһин анаатылар. Ол кэннэ үөрэнээччилэр ааттарыттан оскуола лидерэ Проня Березкин үөрүүлээх күнүнэн барыларыгар махтал тыл маанытын анаата. Оскуола кэллэктиибэ, ытык бэтэрээннэрэ Бочуотунай Грамоталары, махтал суруктары туттулар. РФ үөрэх уонна наука министиэристибэтин Бочуотунай Грамотатынан Анна Семенова, “СӨ үөрэх ситимин Бочуоттаах бэтэрээнэ” Варвара Петрова, “СӨ үөрэх туйгуна” Ольга Слепцова, “Саха сирин эрэлэ” Александра Бурцева, “СӨ ыччат политикатын туйгуна” Екатерина Протодьяконова, ХИФУ ректора Е.Михайлова Бочуотунай Грамотатынан, харчынан бириэмийэнэн наҕараадаланнылар ахсаан учуутала Ольга Слепцова, физкультура учуутала Федор Киренскэй, СӨ спорт министиэристибэтин Махтал суруга туттарылынна физика учууталыгар Фекла Аммосоваҕа, физкультура учууталыгар Федор Киренскэйгэ. Үөрэнээччилэр эҕэрдэ концертара ыалдьыттар, олохтоохтор куттарын тутта. Өрөспүүбүлүкэ, Россия, аан дойду эйгэтигэр тииийэ тахсыбыт “Кустукчаан” вокальнай ансамбль, “Палитра” үҥкүү бөлөҕө аныгы тэтимнээх сайдыыга оҕолор тэҥҥэ алтыһар сатабылларын көрдөрдө. Көстүүмнэрэ эриэккиэһин, ырыалара ылламын, үҥкүүлэрэ үчүгэйкээнин үөрүүлээх күн ыалдьыттара сөхтүлэр-хайҕаатылар. Күүтүүлээх күн оскуоланы араас сылларга бүтэрбит, норуот маастарыгар тиийэ үүммүт үрдүк ааттаах уран уустар Николай Баишев, Никита Петров, Татьяна Ябловская, Степан Баягантаев дьиэ кэргэттэринээн уонна Лена Стручкова оҥоһуктарын көрдөрөр хаартыска-быыстапка үүнэр көлүөнэни кэрэ эйгэтигэр уһуйда. Онтон “Олох киэҥ аартыгар үктэннэрбит выпускниктарбыт” аныгылыы стендэҕэ бары көлүөнэ үөрэнээччилэр хаартыскалара, оскуола историята болҕомтону тартылар. Саамай эдэр меценаппытыгар, соһумардык, хомолтолоохтук сүтэрбит уолбутугар Максим Березкиҥҥа анаммыт стендэни ыалдьыттар аатын үйэтитии саамай сөптөөх диэн бэлиэтээтилэр. Бэлиэ күн чэрчитигэр сыһыары тутан, оҕону үлэнэн иитиигэ туһуламмыт агрохайысхалаах оскуолабытын кытта үлэлэһэр (хотоҥҥо нэһилиэнньэттэн сүөһү ылан уонна оскуола иитэр хороҕор муостаахтара тураллар), ону сэргэ үөрэнээччилэрбитин кытта эмиэ ыкса сибээһи тутар Е.Жирков салайааччылаах “Арыылаах” бааһынай хаһаайыстыбатын аныгы ирдэбилгэ эппиэттиир саҥа тииптээх хотоннорун үөрүүлээх аһыллыыта буолла. Манна улуустааҕы тыа хаһаайыстыбатын управлениетын начаалынньыга Иван Аргунов, солбуйааччы Дмитрий Петров, оскуола дириэктэрэ Любовь Кычкина аалай кыһыл лиэнтэни быстылар. Сахалыы сиэр-туом толорулунна, ыалдьыттары малааһын сандалытынан күндүлээтилэр. 1 из 2
