Игорь Никифоров: «Аммаҕа тутуу тэтимэ үчүгэй»
Ааспыт нэдиэлэҕэ Аммаҕа Бырабыыталыстыба бэрэссэдээтэлин солбуйааччы Игорь Никифоров, «СӨ судаарыстыбаннай сакаас сулууспата» ГКУ генеральнай дириэктэрэ Дмитрий Поисеев уонна кини солбуйааччыта Алексей Варламов кэлэн тутулла турар эбийиэктэри көрдүлэр-иһиттилэр. Болугурга, Покровкаҕа, Чапчылҕаҥҥа уонна Бөтүҥҥэ сырыттылар. Игорь Никифоров Болугурга бу саас атаҕа түспүт 75 миэстэлээх оҕо саадын көҥдөйө бэлиэр бүтэн, эһиил үлэҕэ киирэр чинчилээҕин көрөн хайҕаата. Бу тутуу үбүлээһинин түргэтэтэр ньыманы тобулары Болугур баһылыга Степан Кузьмин туруоруста. Маныаха Игорь Германович СӨ Тутуу министиэристибэтэ «Алмазэргиэнбааны» кытары сөбүлэҥин түһэрсэн, үбүлээһини ыксатар туһунан боротокуолга киллэриэхпит диэн эрэннэрдэ. Оробуочай бөлөх төннөн иһэн Покровкаҕа эмиэ тэтимнээхтик тутулла турар 50 миэстэлээх оҕо саадыгар сырытта. Онтон Аммаҕа уһаабыт-тэнийбит 200 миэстэлээх оҕо саадын көрдүлэр итиэннэ иһигэр бытархай үлэтэ өссө да элбэҕин бэлиэтээтилэр. Маны таһынан, арҕаа дэриэбинэҕэ тутуллуохтаах стадион сирин көрдүлэр, оскуола алааһыгар элбэх функциялаах спортивнай комплекс атахтара түһэриллибитин уонна элбэх кыбартыыралаах дьиэлэргэ тутуу үлэтин билистилэр. Игорь Германович Чапчылҕаҥҥа 2018 сыллааҕы спортивнай оонньууну көрсө тутуллуохтаах спортсаала бырайыагын билистэ. Нэһилиэк баһылыга Юрий Бродников эбийиэк тутуутун «Үтүө дьыала» бырагырааматыгар киллэрэн туттарар баҕалаахтарын иһитиннэрбитигэр, «Аҥардас бырайыакка эрэ сигэннэххитинэ, үбүлээһинэ көрүллэрэ уустук буолуоҕа. Муҥ саатар үлэ нулевой циклын саҕалааҥ. Барыта бэйэҕититтэн тутулуктаах», — диэтэ. Онтон Бөтүҥ нэһилиэгэр элбэх функциялаах спортивнай саала былааннаммыт сирин, бырайыагын олус улахана суоҕунан, 2018 сылга диэри тутуллар кыахтааҕын бэлиэтээтэ. Арай, оскуола тутуутун боппуруоһа мунаах соҕус буолла. Игорь Германович: «Оскуола тутуутун үбүлээһинигэр федеральнай бырагыраамаҕа хапса сатааҥ. 2018-2019 сыллааҕы бырагыраамаҕа киирдэҕинэ тутуллуон сөп. Онтон аҥардас өрөспүүбүлүкэ бүддьүөтүнэн туттахха, үлэ олус уһаан-тэнийэн хаалыаҕа», — диэн сүбэлээтэ уонна СӨ Тутуу министиэристибэтигэр федеральнай бырагыраамаҕа киллэрэргэ үлэлэһэллэрин курдук дьаһал биэриэм диэн эттэ. Эбиэттэн киэһэ күннээҕи сырыыны ырытыһар мунньахха Игорь Германович Аммаҕа тутуу үлэтэ үчүгэйдик барарын бэлиэтээтэ. Чуолаан, хаарбах туруктаах дьиэлэртэн көһөрүү бырагырааматыгар улуус сөптөөх үлэ ыытарын, 2016 сылга былааннаабыт кээмэйин толорбутун эттэ. Итиэннэ нэһилиэк баһылыктара хаарбах туруктаах дьиэлэрин реестрга салгыы эбии киллэрэллэригэр сүбэлээтэ. Улуус баһылыга Николай Архипов 2018 сыллааҕы оонньуулары көрсө тутуллуохтаах эбийиэктэр болдьоҕор толоруллалларын улуус бүттүүн эрэнэ кэтэһэрин эттэ уонна тутуу өттүгэр күөрэйэр араас боппуруостарга Игорь Германович өйөбүл буоларыгар көрдөстө. Улуус баһылыгын тутуу боппуруоһугар солбуйааччы Дмитрий Иванов былааннаммыт тутуулары үлэҕэ киллэрдэхтэринэ уот мөлтөҕө кыһалҕаны үөскэтиэн сөптөөҕүн ыйда. Итиэннэ күүстээх уоту Сулҕаччы өттүттэн аҕалар туһунан тыл көтөхтө. Улууска гааһы аҕалыыны эмиэ таарыйда. Түмүккэ Игорь Германович биһиги улууспутун кытта уруккуттан, өссө «Якутуголь» дириэктэрин солбуйааччытынан үлэлии сылдьар кэмиттэн ыкса үлэлэһэрин эттэ. «Бүгүҥҥү сырыыбыттан көрдөххө, улууска тутуу сөптөөхтүк барарын туһугар кыһаллар, үлэлиир эбиккит. Биһиги СӨ Тутуу министиэристибэтин кытары күүс-көмө буолуохпут», — диэн эрэннэрдэ.
