Эдэр дьиэ кэргэттэргэ үөрүүлээх күн

Мэҥэ Хаҥалас улууһугар, Майаҕа, саҥа оҕоломмут эдэркээн ийэлэр дьиэлэригэр-уоттарыгар тахсалларыгар үөрүүлээх тэрээһин буолла. Эдэр дьиэ кэргэттэр Быраматтан Светлана, Петр Шестаковтар, Бөкөттөн Уйгулаана, Андрей Зыковтар, Бүтэйдээхтэн Изабелла, Александр Егоровтар, Маттаттан Ньургуйаана Гаврил Марковтар, Павловскайтан Вера, Константин Петровтар, Аллараа Бэстээхтэн Сахайаана Захарова, Майаттан Ирина, Гаврил Кычкиннар төрдү-ууһу салгыыр ыччаттардаммыттарынан үтүө тыллар ананнылар. Маннык эҕэрдэлээһини Дьиэ кэргэн уонна Ийэ күнүгэр анаан ыытар үтүө үгэс баар. Долгутуулаах, үөрүүлээх күн улуустааҕы дьиэ кэргэн, ыччат управлениетын салайааччылара Константин Захаров уонна Ирина Назарова оройуон дьаһалтатын аатыттан эҕэрдэ суруктары, сэмэй бэлэхтэри туттардылар. Эдэр дьиэ кэргэттэр үөрүүлэрин үллэстэ баһылыктар Майаттан Тимофей Нестеров, Бөкөттөн Иван Новгородов, Быраматтан Гаврил Ефимов, Павловскайтан Николай Федоров о.д.а. кэллилэр. Кинилэр маҥан халааттаах аанньалларга махтал тылларын, эдэрдэргэ кэс тылларын тиэртилэр. Быйыл Майатааҕы оҕолонор дьиэҕэ (роддомҥа) 424 кырачаан, ити иһигэр 220 уол, 204 кыыс оҕо күн сирин көрбүт. Маныаха биһиги улууспутугар оҕо төрөөһүнэ илин эҥэр улуустардааҕар элбэҕин бэлиэтииллэр. Кырачааннарга күн сирин кэрэтин бэлэхтээбит төрөппүттэр улуус кылаабынай гинеколог-бырааһыгар, отделение сэбиэдиссэйигэр Зоя Москвинаҕа, ыстаарсай акушерка Февронья Скрябинаҕа, неоанатолог-быраас Айаал Сивцевкэ уо.д.а. махталлара улахан. Өр сылларга үлэлээбит кэллэктиип эдэр дьиэ кэргэттэргэ тус олохторугар этэҥҥэ буолууну баҕардылар, кырачааннарын чөл доруобуйалаах, үтүө дьон гына иитэн таһааралларыгар алгыы хааллылар. 1 из 3