Нам улууһун 1 Хомустааҕар 12 кыбартыыралаах саҥа дьиэ хаһаайыттарыгар күлүүстэри туттардылар

“1 Хомустаах нэһилиэгэ” МТ «2013-2017 сс. хаарбах туруктаах дьиэттэн дьону көһөрүү» диэн тус сыаллаах программа чэрчитинэн Алексей Пинигини кытта дуогабар түһэрсибитэ. Ол түмүгэр 12 ыал саҥа таас дьиэ хаһаайыттарынан буоллулар. Дьиэни үлэҕэ киллэрии үөрүүлээх тэрээһинигэр «Нам улууһа» МТ баһылыга Александр Атласов, «1 Хомустаах нэһилиэгэ» МТ баһылыга Василий Жирков, «Якутские тепловые сети» ХЭТ гендиректорын солбуйааччы Георгий Алексеев, саҥа дьиэ хаһаайыннарын аатыттан Любовь Адьютантова аалай кыһыл лиэнтэни кырыйдылар. Символическай күлүүһү нэһилиэк баһылыгар Георгий Дмитриевич туттарда. Дьиэ үйэлээх, сылаас, сырдык, дьиэ кэргэн иллээх-эйэлээх буоларыгар аал уоту алҕаан, арыылаах алаадьынан күндүлээн СӨ культуратын туйгуна, алгысчыт Филипп Соловьев алгыс сиэрин-туомун толордо. Бу күн 1 Хомустаах 12 ыала нэһилиэк баһылыгыттан кыбартыыраларын күлүүһүн тутан үөрүүлэрэ үксээтэ, улуус, нэһилиэк дьаһалтатыгар, туппут тэрилтэҕэ махтаннылар. 1 из 7 «Быйыл Нам улууһун 1 Хомустааҕар СӨ норуотун хаһаайыстыбатын үтүөлээх үлэһитэ Дмитрий Федотович Алексеев төрөөбүтэ 80 сылын көрсө, Үлэ уонна сайдыы сылыгар 3 улахан тутууну үлэҕэ киллэрдилэр. Ол курдук, 2016 сыл саҕаланыыта, олунньуга спорт саала, муус устарга «Мичийээнэ» оҕо саада үлэҕэ киирбиттэрэ уонна сэтинньи 25 күнүгэр 3 мэндиэмэннээх, 12 кыбартыыралаах, толору хааччыллыылаах таас дьиэни «Хаарбах туруктаах дьиэттэн дьону көһөрүү» программанан тутан бүтэрдилэр», — диэн улуус баһылыга Александр Павлович санаатын үллэһиннэ.