Үөрэх бастыҥнара — сүлүөт кыттыылаахтара
Сунтаар улууһугар Бордоҥ орто оскуолатын киэҥ-куоҥ саалатыгар үөрэх бастыҥнарын чиэстиир сүлүөт быйыл тохсус төгүлүн үрдүк таһымнаахтык буолан ааста. Тэрээһиҥҥэ, буоларын курдук, төрөппүттэр, учууталлар, тэрилтэ салайааччылара, түөлбэлэр бэрэстэбиитэллэрэ көхтөөхтүк кытыннылар. Бу сүлүөл тоҕус сыл устатыгар кэнчээри ыччаты үөрэх-билии киэҥ аартыгар сирдиир, угуйар соруктаах ыытыллар. Манна мустубут кыттыылаахтар оҕо билиитин-көрүүтүн сайыннарыыга туох санаалаахтарын үллэстэллэр, туох ситиһиилэммиттэрин, үлэҕэ тугу эбэри, туох саҥаны киллэрэри кэпсэтэллэр. Бу барыта үүнэр көлүөнэҕэ бигэ далаһаны уурара саарбахтаммат. Сүлүөккэ урукку кэм бастыҥнара кыттыыны ылаллара, санааларын тиэрдэллэрэ оҕолорго тирэх буолар, инникигэ эрэли күүһүрдэр. Маныаха күн бүгүн биһиги киэн тутта ааттыыр дьоммут элбэхтэрэ үөрдэр. Холобур, бастакы сүлүөт кыттыылааҕа Петр Старостин баар. Билигин кини Санкт-Петербург куоракка модельер-дизайнерынан үлэлиир. Оскуоланы кыһыл көмүс мэтээлинэн бүтэрбит Алиса Омукова (2-с сүлүөт кыттыылааҕа) Москубаҕа Экономика үрдүкү оскуолатын бүтэрэн, билигин бааҥҥа үлэлиир. Алина Спирова (3-с сүлүөт) Дьокуускайдааҕы математика уонна информатика институтун кыһыл дипломунан бүтэрэн, экономист идэтин ылбыта. Анастасия Старостина (4-с сүлүөт) билигин магистратураҕа үөрэнэр. Александр Андреев (5-с сүлүөт) Мииринэйдээҕи политехническай институт устудьуона уо.д.а. ааттаталыы туруохпутун сөп. Ити курдук биһиги оскуолабытын бүтэрбит оҕолор сүлүөттэн куорсун анньынан, олох киэҥ суолугар дайа көппүттэрэ биһиэхэ үтүө холобур буолар. Онтон быйылгы сүлүөт бастыҥ үөрэнээччилэригэр тэрилтэлэр, түөлбэлэр салайааччылара дохсун ытыс тыаһыгар доҕуһуоллатан уонна үтүө алгыс тылларын анаан туран истипиэндьийэлэри туттардылар. Ол кэннэ, учууталлар кэскиллээх, талааннаах, бастыҥ үөрэнээччилэригэр анал номинациялары анаатылар. Бастатан туран, оскуола дириэктэрэ В.Т.Григорьев бэйэтин номинациятын 9-с кылаас туйгун үөрэнээччитигэр Алена Даниловаҕа туттарда. Дириэктэри үөрэх чааһыгар солбуйааччы Л.Н.Спирова тус номинациятын 9-с кылаас бастыҥ үөрэнээччитигэр Юлиан Козловка анаата. Оттон дириэктэри иитэр-үөрэтэр үлэҕэ солбуйааччы С.С.Федоров номинациятын эмиэ 9-с кылаас үөрэнээччитигэр Катя Федотоваҕа туттарда. Ити курдук кэскили түстүүр, инникигэ эрэли саҕар, дириҥ билиини-көрүүнү ыларга угуйар сүлүөт хас биирдии үөрэнээччигэ умнуллубат кэрэ түгэни бэлэхтээтэ..
