Үөһээ Бүлүүгэ үөрүүлээх миитин буолла

Бүгүн, муус устар 24 күнүгэр, Саха Өрөспүүбүлүкэтин Күнүн көрсө, Үөһээ Бүлүү улууһугар Харбалаах нэһилиэгэр улахан долгутуулаах уонна үөрүүлээх күн буолла. Бүгүн уһулуччулаах политическай диэйэтэл Исидор Никифорович Барахов төрөөбүт дойдутугар, кини пааматынньыгын иннигэр үөрүүлээх миитиҥҥэ дьон-сэргэ тоҕуоруста. Миитиҥҥэ СӨ Бырабыыталыстыбатын солбуйааччы Михаил Гуляев, Ил Түмэн вице-спикерэ Ольга Балабкина, Ил Түмэн народнай депутата Марфа Филиппова, спорт миниистирин солбуйааччы Семен Чердонов, Үөһээ Бүлүү улууһун баһылыга Владимир Поскачин, Харбалаах нэһилиэгин баһылыга Илья Кузьмин, улуус мунньаҕын сэбиэтин бэрэссэдээтэлэ Семен Михалев о.д.а. кыттыыны ыллылар. Ону таһынан, оскуола оҕолоро – инники кэскилбит Исидор Барахов пааматынньыгын тула мустан чулуу киһибитигэр сүгүрүйдүлэр. Убаастабыллаах ыалдьыттарбыт Саха Өрөспүүбүлүкэтин историятын сэгэтэн, уһулуччулаах судаарыстыбаннай диэйэтэллэри Максим Аммосовы, Платон Ойуунускайы, Исидор Бараховы, Степан Аржаковы ахтан-санаан аастылар, кинилэр үлэлээбит, туруорсубут үлэлэригэр дириҥ ытыктабылларын биллэрдилэр. Ил Түмэн вице-спикерэ Ольга Балабкина миитиҥҥэ мустубут дьону истиҥник эҕэрдэлээтэ уонна Исидор Барахов хас биирдиибитигэр холобур буоларын тоһоҕолоон эттэ. Түмүккэ, үөрүүлээх миитин кыттыылаахтара пааматынньыкка тыыннаах сибэккилэри уурдулар.