Бүлүү Бөтүҥэр саҥа хотон үлэҕэ киирдэ
Сэтинньи 26 күнүгэр Бүлүү улууһун Бөтүҥэр 100 төбөҕө аналлаах хотону үөрүүлээх быһыыга-майгыга арыйыы сиэрэ-туома ыытылынна. Аныгы матырыйааллартан кылгас кэм иһигэр тутуллубут хотону үөрүүлээх арыйыы сиэрин-туомун Бөкчөҥөө киэҥ-туттар киһитэ Степан Семенов арчылаан ыытта. Кыһыл лентаны тыа хаһаайыстыбатын министрин солбуйааччы Афанасий Семенов, “Туймаада” ФАПК генеральнай директорын бастакы солбуйааччы Алексей Захаров, улуус дьаһалтатын баһылыга Сергей Винокуров, Бөкчөҥөө нэһилиэгин баһылыга Иван Евсеев, “Бөтүҥ” кооператив салайааччыта Олег Федоров, нэһилиэк ытык кырдьаҕаһа Ким Иванов быстылар. Тыа хаһаайыстыбатын министрин солбуйааччы Афанасий Семенов эҕэрдэ тылыгар быйылгы дьылга Россия, Саха сирин тыатын хаһаайыстыбатын министиэристибэлэрин көмөлөрүнэн механизациялаах хотоннор, дьиэ-уот, мелиоративнай тутуулар үлэҕэ киирбиттэрин, ити иһигэр Бөтүҥҥэ киэҥ, сырдык хотону бары бииргэ үлэлээн киллэрбиттэрин, олохтоох дьон тутууга кыттыспытын бэлиэтээтэ. “Туймаада” ФАПК генеральнай директорын бастакы солбуйааччы Алексей Захаров Бөтүҥҥэ тутуллубут хотон ФАПК 26 хотоно буоларын, бырайыагын “Якутагропроект” оҥорбутун, сакаасчыт “Туймаада” – ФАПК буолбутун, бэдэрээччитинэн – “Хаҥалас-риелти” үлэлээбитин аҕынна. Кини хотон символическай күлүүһүн “Бөтүҥ” кооператив салайааччыта Олег Федоровка туттарда. Саҥа киирбит хотоҥҥо үгэс быһыытынан ФАПК-лар илии тутуурдаах кэлэн, үлэһиттэр туһаналларыгар микроволновка оһоҕу бэлэхтээтилэр. 1 из 6 Хаһаайыстыба салайааччыта Олег Федоров толору хааччыллыылаах, механизациялаах хотоҥҥо 120 хороҕор муостаах турарын, эргэ хотоҥҥо сүөһү эмиэ сүөһүлэр хаалбыттарын, “Ампаардаах” ХЭУО-тан ылыллыбыт ынахтар төрөөн эрэллэрин иһитиннэрдэ. Хотону үөрүүлээх арыйыы кэннэ саҥа таас оскуолаҕа тыа хаһаайыстыбатын сайыннарыыга тэриллибит “Төгүрүк остуолга” мустубут тыа хаһаайыстыбатынан быһаччы дьарыктанар специалистар, производственниктар санааларын атастылар. Тыа хаһаайыстыбатын министрин солбуйааччы Афанасий Семенов: «Хотоннору тутуу саҥа ньымата үчүгэйин көрдөрдө. Тутуу түргэнник ыытыллар уонна хаһаайыстыбаҕа сүктэриллэр ороскуота бэрт кыра буолан хаһаайыстыба иэскэ киирбэт. Үлэлии үөрэммит биригээдэлэр кылгас кэм иһигэр туталлар. Сирин, эбии матырыйааллары бэлэмнээһиҥҥэ олохтоох дьаһалталар үлэлэһэллэр«, — диэн эттэ.
