Ещё

Илимнииргэ — субуотунньук 

Фото: ЯСИА.RU
Ыам ыйын 3-4 күннэригэр Илимниир нэһилиэгэр Гражданскай оборона субуотунньуга көхтөөхтүк ыытылынна. Нэһилиэк баһылыга Ипатий Иванов кулун тутар 20 күнүнээҕи 02-14/15 нүөмэрдээх дьаһалыгар олоҕуран, икки ый устатыгар Илимниир нэһилиэгин ыраастааһыҥҥа уонна нэһилиэк олоҕун-дьаһаҕын тупсарыыга дьаһала тахсыбыта. Дьаһал сүнньүнэн анал хамыыһыйа тэриллэн былааннаахтык үлэтин саҕалаата. Нэһилиэк бары тэрилтэлэрин үлэһиттэрэ территорияларын ыраастаан, чааһынай ыал бөҕүн-саҕын сыбаалкаҕа тиэйии, күөл, өрүс кытыыларын, бөх тиэллэр сирин, эргэ пиэрмэ таһын өр сылларга мунньуллубут кири-хоҕу оннуттан ыраастааһын үлэлэрэ ыытылла тураллар.
Нэһилиэк биир саамай улахан тэрилтэтэ — оскуола. Үөрэнээччилэр, учууталлар уонна бары техүлэһиттэр ыраастааһыҥҥа сыл ахсын көхтөөхтүк кытталлар. Былаан быһыытынан оскуолаҕа Экология нэдиэлэтин биология учуутала Иванова М. Н. тэрийэн ыытта. Үөрэх сылын бүтүүтэ оскуола олбуоругар тупсаҕай сибэкки иһиттэрин оҥорорго үөрэнээччилэргэ күрэс ыытыллыаҕа, мас, арассаада олордуута былааннанар.
Сайын ыһыахпыт ыһыллар пааркатыгар элбэх үлэ ыытыллыаҕа. Эргэ хорчуоппалары көтүрүү, саҥардыы, паарка сценатын саҥа бырайыагынан тутуу, түһүлгэҕэ киирэр аарка оҥоһуута. Бу үлэлэр барыта олохтоох дьаһалта, дьокутааттар, эдэр ыччат, тэрилтэлэр, уопсастыбаннас күүстэринэн ыытыллара былааннанар. Ааспыт кэмнэр үтүө үгэстэрин төнүннэрэн, «Норуот күүһэ — көмүөл күүһэ» диэн саха өс хоһоонугар олоҕуран, нэһилиэк дьоно-сэргэтэ биир түмсүүлээх буоларга бигэ санаалаах бииргэ сомоҕолоһор, биир санаанан үлэлиир.
Комментарии
Читайте также
Новости партнеров
Больше видео