Саҥа кинигэ сүрэхтэннэ

“Түһүлгэ” сынньалаҥ киинин үлэһиттэрэ нэһилиэккэ кулууп үлэлээбитэ 70 сылыгар анаан “Кэрэҕэ талаһыы умсулҕанынан…” диэн ааттаан бэртээхэй кинигэни бэчээттэттилэр. Кинигэҕэ тыа сирин кулуубуттан саҕалаан сынньалаҥ киинэ буолуор диэри үлэлээн ааспыттар, уус-уран самодеятельность кыттыылаахтара, билиҥҥи директор Харитонова А.А. иһирэх монолога история хаамыытынан наарданан киирбиттэр. Кинигэ ис хоһоонун нэһилиэк баһылыга Максимов И.Н. киирии тыла, урукку культура управлениетын салайааччылара Габышева М.Н., Горохова Р.Н., Новиков И.С. ахтыылара ситэрэн, толорон биэрбиттэр. Бу маассабай-политическай таһаарыы хас биирдии илииһэ өҥнөөх, элбэх хаартыскалаах, нэһилиэк урукку да, билиҥҥи да дьонун хаппыт буолан ааҕааччылар болҕомтолорун тардар. Кинигэ 200 экземплярынан “Компания “Дани-Алмас” ХЭУо типографиятыгар бэчээттэнэн таҕыста. Нэһилиэккэ культура эйгэтин сырдатар кинигэни олохтоох дьаһалта үбүлээн үчүгэй хаачыстыбалаах, сиэдэрэй көстүүлээх буолбут. Хамаҕатта нэһилиэгэр культура тэрилтэтэ үлэтин сырдатар “Кэрэҕэ талаһыы умсулҕанынан” саҥа кинигэ тахсыбытын сүрэхтиир дьоро киэһэ буолла. Биэчэр “Истиҥ көрсүһүү” диэн ааттанан ааста. Өрө күүрүүлээх фанфар доҕуһуолунан “Түһүлгэ” сынньалаҥ киин үлэһиттэрэ тахсан кинигэҕэ киирбит ахтыылартан кулууп туһунан истиҥ тыллары, сыанабыллары быһа тардан ааҕыыларынан, Татьяна Гаврильева эҕэрдэ ырыатынан, нэһилиэк баһылыга Максимов И.Н., Нам улууһун культураҕа управлениетын начальнига Заровняева Е.А. эҕэрдэ тылларынан саҕаланна. 1 из 7 Кинигэ биһирэмин саха телевидениетын ыытааччыта Георгий Белоусов “Ис сүрэхтэн…” авторскай биэриитин киэбинэн ыытта. Ол курдук, бэйэтин аттыгар сэргэстэһэ кинигэ геройдарын ыҥырталаан хас да түһүмэҕинэн кэпсэтиини тэрийдэ. Бу кэпсэтии бастакы түһүмэҕэр баһылык Максимов И.Н., улууска культура отделын салайан ааспыт билигин “Тыгын Дархан” ресторан директора Габышева М.Н., культура үлэһиттэрин идэлээх сойууһун председателэ Горохова Р.Н. оччотооҕу кулууп үлэһиттэрэ идеология байыастара буолалларын бэлиэтээн аастылар, кинигэ хрестоматийнай суолтатын ыйдылар. Салгыы культурнай-сырдатар, агитационнай-маассабай үлэ ис хоһоонун өр сылларга сэбиэт председателинэн үлэлээбит Захаров Н.Д., кулуупка араас кэмҥэ үлэлээбит Заровняева А.З., Кондратьева Т.А., Баишева Ф.Г., Олесова А.И., Андросова Л.А. уонна Кривогорницына М.В. сырдаттылар. Кинилэр ахтыыларыттан иһиттэххэ саамай уһуннук, айымньылаахтык кулууп директорынан Жиркова М.А., Кривогорницын Ю.В. үлэлээбиттэр. Салгыы Георгий Белоусов онус сылын үлэлиир билиҥҥи директоры Харитонова А.А., уус-уран самодеятельность активистарын Саввинова Е.Г., Жиркова Е.Н. ыҥыртаан истиҥ кэпсэтиини таһаарда. Кинигэ ис хоһоонугар олоҕуран кэпсэтиигэ педагогическай үлэ ветераннара Кривошапкина В.С., Касьянова Е.М. санааларын эттилэр, оччотооҕу ыччат, Хамаҕаттаҕа ВИА-ны төрүттэспит, билигин “Эҥсиэли” хаһыат редактора Касьянов В.Г. кулууп үлэтэ нэһилиэнньэҕэ, ыччакка суолтатын чорботон ахтан аастылар. Кулууп культурнай-сырдатар үлэтигэр библиотека, киинэ оруолун туһунан өр сыл библиотекардаабыт Емельянова О.П., киномеханик Охлопков Е.С. туһунан кыыһа Охлопкова М.Е. сырдаттылар. Нэһилиэк мелодистарын аатыттан саха-француз лицей учуутала Новгородова С.С., звукооператорынан үлэлээбит Гоголев Р.Н. ахтыы оҥордулар. Таатта Чөркөөҕүттэн Федосеева К.П. кэлэн эргэ кулуупка өр сыл остуораһынан үлээбит ийэтин Протопопова Е.И., эдьиийин Винокурова А.С. кэриэстээн, кинигэҕэ ахтыыта киирбититтэн үөрүүтүн биллэрэн, дуоһуйан барда. Истиҥ көрсүһүүнү, ис сүрэхтэн кэпсэтиини “Кыталыына” вокальнай ансаамбыл, ырыаһыт Илья Заболоцкай эҕэрдэ ырыаларынан киэргэттилэр. Нэһилиэккэ культура эйгэтэ сайдыытыгар улахан кылааттаах дьону бэлиэтиир үөрүүлээх чааска элбэх киһи араас наҕарааданы тутта. Олор истэригэр Саввинова Е.Г. “За вклад в развитие народного художественного творчества РС(Я)” бочуоттаах ааты ылла. Культура министерствотын Бочуотунай грамотатын уһуннук бэриниилээхтик үлэлии сылдьар Канаева Т.Д. тутта. “Почетный работник культуры МО “Намский улус” аат Заровняева А.З. иҥэрилиннэ. ГУ РС(Я) “Арктика” Махтал суругунан Андросова Л.А. бэлиэтэннэ. Улуустааҕы Культура управлениетын Бочуотунай грамотатын Москвитина О.С., культура профкомун Бочуотунай грамотатын Больницкай В.Г., Охлопкова Е.Х., Васильева А.Н., “За вклад в развитие МО “Хамагаттинский наслег” бэлиэни Емельянова О.П. туттардылар. Ону таһынан үлэлээн ааспыттарга нэһилиэк Бочуотунай грамотатын сибэкки дьөрбөтүн кытта туттарбыттара үөрүүлээх уонна долгутуулаах буолла. Кинигэни сүрэхтиир тэрээһиҥҥэ улуус дьаһалтатыттан Сергучев С.Н., республикатааҕы норуот айымньытын киинин научнай салайааччыта Корякин А.Н. ыалдьыттаатылар. Истиҥ көрсүһүү СР үтүөлээх артыыстара Екатерина, Алексей Егоровтар уонна кинилэр салайар “Сэргэлээх сулустара” вокальнай студия ырыаһыттара кыттыылаах “Эйиэхэ мин ырыа бэлэхтиэм” концерынан түмүктэннэ. “Түһүлгэ СК коллектива Хамаҕаттаҕа культура эйгэтэ сайдыытын кэрэһэлиир дьоһун кинигэни таһааран кэрэ бэлэҕи оҥордо.