Тулалыыр эйгэни харыстааһыҥҥа туһуланна

Олунньу 9 күнүгэр Амма тэрилтэлэрин салайааччыларыгар СӨ айылҕа харыстабылын министиэристибэтин исписэлиистэрэ тулалыыр эйгэни харыстааһын туһунан федеральнай сокуону билиһиннэрдилэр. Бу билиҥҥи кэмҥэ билиини чиҥэтэр, сокуон кэһиитин таһаарбат туһугар ыытыллыбыт семинары улуустааҕы айылҕа кэмитиэтин салайааччы Семен Заровняев көҕүлээн ыытта. Семинар сүрүн сыала салайааччылар федеральнай сокуону үчүгэйдик билэн, ыытыллар бэрэбиэркэлэри этэҥҥэ ааһан, тулалыыр эйгэни харыстааһыҥҥа кэһиилэри таһаарбаттарын туһугар туһуланна. Иһитиннэриилэри СӨ айылҕа харыстабылын министиэристибэтин иһинэн баар экология өттүнэн куттал суох буолуутун управлениетын кылаабынай исписэлииһэ Евдокия Кузьмина, госиниспиэктэр Михаил Андреев, хонтуруоллуур аналитическай үлэ уонна уу сыһыаннаһыыларын управлениетын салайааччытын солбуйааччы Анисия Игнатьева оҥордулар. Бу семинар кыттыылаахтара сайабылыанньаны хайдах суруйартан саҕалаан докумуоннары толорууга, отчуоту сөптөөхтүк оҥорууга, сокуон ирдэбиллэрин тутуһууга тиийэ элбэҕи билэн бардылар. Түмүккэ, кэмиттэн кэмигэр маннык туһалаах көрсүһүүлэр буолаллара олус наадалааҕын ыйдылар.