Экология, Ыччат, Дьиэ кэргэн сыллара саҥа хамсааһыннары таһаарыахтара
Улуус киинигэр, Тааттатааҕы норуот тыйаатырыгар, Россияҕа — экология, СӨ — Ыччат, Таатта улууһугар — дьиэ кэргэн уонна ыччат сылларын үөрүүлээхтик аһыы тэрээһинэ үрдүк таһымнаахтык буолла. Бу күн сарсыарда өттүгэр бырайыактар, ыытыллыбыт үлэлэр, норуот маастардарын, фотографтар, үөрэҕирии эйгэтин үлэлэрин быыстапкалара тэрилиннилэр. «Таатта улууһа» МТ баһылыга М.Соров сыллар хайа да хайысхаҕа ыытыллыылара ааспыт сылларга үлэлэммити ырытан, анааран көрөргө уонна саҥа соруктары туруорарга, олоххо киллэрэргэ туһаайыллалларын, урукку да өттүгэр итинтэн сиэттэрэн сайдыыга тахсыы куруутун салҕанарын бэлиэтээтэ. 2017 сылга туһаайыллыбыт сыллартан, дойду үрдүнэн барыбытын долгутар айылҕаҕа харыстабыллаах сыһыан мөлтөөбүтүн туоратыыга ыытыллыахтаах үлэлэр далааһыннаналларыгар баҕарда. Маны сэргэ, ыччат идэ ылар үөрэҕэр кыһамньылаахтык үөрэнэн, үрдүк квалификациялаах исписэлиис буолан тахсарыгар, общественнай үлэлэргэ көхтөөхтүк кыттарыгар, дэгиттэр сайдыылаах буоларыгар, нэһилиэктэрин, улуустарын, өрөспүүбүлүкэни сайыннарыыга сүдү кылааттарын киллэрсибит дьиэ кэргэттэр ахсааннара элбииригэр үлэ өрө көтөҕүллүүлээхтик ыытылларыгар элэллээҕин эттэ. Улуус баһылыгын солбуйааччылар И.Сивцева дьиэ кэргэн сылыгар кэскиллээх тэрээһиннэр, А.Попов улууска экологическай хамсааһыннар ыытыллыахтаахтарын билиһиннэрдилэр. Ыччат уонна дьиэ кэргэн политикаларыгар салалта салайааччыта К.Егоров биир саастыылаахтарыгар, ытыктыыр аҕа саастаах дьонугар этиитин бары астына истэн, дохсун ытыс тыаһынан махтанныбыт. Таатта ыччаттарын эҕэрдэлии, инники үлэни торумнаһа СӨ ыччат уонна дьиэ кэргэн политикатын министиэристибэтин ыччат политикатын салайыы уонна сабаҕалааһын салаатын салайааччы, Чымынаайыттан төрүттээх биир дойдулаахпыт, И.Жегусов аатынан гимназия выпускнига Василий Данилов Дьокуускайга буолуохтаах ыччакка аналлаах Бүтүн Россиятааҕы улахан тэрээһиннэргэ, улуус иһигэр киэҥ өрүттээх үлэни ыытыыга Таатта ыччаттара инники күөҥҥэ сылдьалларыгар эрэллээҕин биллэрдэ. Министиэристибэттэн грамоталары уонна махтал суруктары киэн туттар ыччаттарбыт Д.Апросимов (Баайаҕа), А.Осипова (Уус Таатта), П.Доргуев (улуустааҕы баһаарынай чаас), Г.Нестеров (Чымынаайы), Е.Протопопова (СӨ психологическай киинин психолога), о.д.а. ылан салгыы үлэлииллэригэр тирэҕирдилэр. Ыччаттарбытыгар ХИФУ устудьуоннарын профсойууһун «ВиНиЛ» добровольческай сойууһун киинин салайааччы, эбии үөрэхтээһин педагога М.Гуринов, «Россия устудьуоннарын этэрээттэрэ» Саха сиринээҕи салаатын үлэ биэрээччилэри кытта үлэ испэсэлииһэ А.Соломонов сүбэ-ама биэрдилэр. Култуура уонна духуобунай сайдыы улуустааҕы салалтатын уус-уран салайааччыта М.Федорова салалтатынан ыччаттар тэрээһини истиҥник-иһирэхтик тэрийистилэр. Үөрүүлээх дьоро киэһэҕэ мустубут бар дьону Тыараһаттан, Уолбаттан, Ытык Күөлтэн «Икки сулус-2017» улуустааҕы ырыа куонкуруһун кыайыылаахтара, талааннаах ырыаһыттар, «Алдаана» вокальнай ансаамбыл бэйэлэрин ырыаларынан эҕэрдэлээтилэр. Онон, Таатта улууһугар 2017 сылтан ыччаттарбыт турунан, дьиэ кэргэттэр, айылҕа харыстабылыгар «ЭКО-ситим» экологтар түмсэн, улуус сайдыы саҥа таһымыгар тахсарыгар сүдү кылааттарын киллэрсиэхтэрэ диэн эрэллээхпит.
