Сунтаарга Чысхаан ыалдьыттаата

Тыйыс тымныылаах Өймөкөөн сириттэн Сунтаарга Тымныы кырдьаҕаһа – Чысхаан ыалдьыттаата. Көрсүһүү «Сохраним красавицу реку Вилюй – жемчужину Якутии» өрөспүүбүлүкэтээҕи аахсыйа чэрчитинэн ыытылынна. Чысхааны кытары «Амма кырдалын ыччата» түмсүүнү салайар Саргылаана Неустроева, «Кэскил» уонна «Юность Севера» оҕо хаһыаттарын кэрэспэдьиэнэ Екатерина Киприянова ыалдьыттаатылар. Бырайыак «Амма кырдалын ыччата» түмсүү көҕүлээһининэн иккис сылын ыытыллар. Былырыын аахсыйа Таатта, Чурапчы, Амма, Уус-Алдан уонна Мэҥэ-Хаҥалас улуустарыгар бэрт сэргэхтик буолбут. Быйыл күүтүүлээх ыалдьыттар Бүлүү бөлөх улуустарынан сылдьыахтара. Аахсыйаны тэрийээччи Саргылана Неутроева кэпсиир: — Быйылгы тэрээһиммитин Сунтаар улууһуттан саҕалаатыбыт. Чысхаан Саха сирин дьонун-сэргэтин, айылҕатын, тымныы уонна сылаас дьүөрэлэһиитин муҥутуур күүһэ буолар. Кини дойдубут айылҕатын саамай күүстээх көстүүтэ, онон ыччаты бу тула түмэр биһиги сүрүн сыалбыт. Маныаха Сунтаар улууһа экология хайысхатыгар улахан хардыы оҥордо диэххэ наада. Ол курдук, улуус киинигэр уонна 12 нэһилиэккэ уу ыраастыыр тэриллэр туруорулуннулар. Бу 55 мөл. солк. суумалаах улахан үлэ, улахан ситиһии. Онон улуус баһылыга Анатолий Григорьевка улаханнык махтанабыт. Тымныы Оҕонньор Сунтаарга «Туллукчаан» оҕону сайыннарар киин иитиллээччилэригэр ыалдьыттаабыта кырачааннарга умнуллубат саҥа дьыллааҕы күндү бэлэх буолла. Салгыы В.Павлов аатынан алын сүһүөхтээх оскуола, Сунтаардааҕы коррекционнай оскуола уонна «Кэскил» реабилитационнай киин иитиллээчилэрин кытары көрүстэ. Киэһээ Ленин болуоссатыгар нэһилиэкпит олохтоохторун кэлэн иһэр Саҥа дьылынан эҕэрдэлээтэ. Ыалдьыттар салгыы Ньурба, Үөһээ Бүлүү, Бүлүү уонна Горнай улуустарыгар айанныахтара. 1 из 8