Сунтаарга бильярдка күрэхтэһии буолла

Элгээйи нэһилиэгин «Оһуор» култуура киинигэр бильярдка улуус таһымнаах күрэхтэһии буолан ааста. Тэрээһини быйыл 60 сааһын туолбут, бильярд спордун көҕүлээччи, тарҕатааччы Станислав Миронов уонна олохтоох култуура киинэ иилээн-саҕалаан ыыттылар. Күрэскэ улуус уонча нэһилиэгиттэн барыта 60 оонньооччу кэлэн күөн көрүстэ. Икки күн салҕаммыт сытыы киирсиилэр түмүктэринэн, 60-тан үөһэ саастаах бэтэрээннэргэ кыайыы өрөгөйүн Владислав Яковлев (Сунтаар) биллэ. Иккис бочуоттаах миэстэҕэ Кутана бильярдиһа Борис Николаев таҕыста. Соторутааҕыта бильярд оонньуутугар кэккэ уларыйыылар киирэннэр, икки киһи Анатолий Иванов (Кутана) уонна Радомир Петров (Бордоҥ) үһүс бочуоттаах миэстэни ылан үөрдүлэр. 60 саастарыгар диэри I м. Фрументий Потапов (Түбэй Дьаархан), II м. Борис Яковлев (Элгээйи), III м. Дмитрий Спиридонов (Сунтаар) уонна Стас Стручков (Бордоҥ) ыллылар. Кыайыылаахтар уонна призердар мэтээли, кубогы туттулар, сыаналаах бириистэринэн наҕараадаланнылар.