Ещё

Энергетиктар кыһыҥҥа бэлэмнэнэллэр 

Фото: ЯСИА.RU
Сайын саҥа саҕаланна эрээри, «Якутскэнерго» тэрилтэ бары салаалара номнуо тымныы кэм кэлэригэр бэлэмнэнэ сылдьаллар. Энергетиктар 26,03 МВА уопсай кыамталаах 75 трансформаторы, 10,7 МВТ уопсай кыамталаах 7 дизель-генераторы, «Сахаэнерго» тэрилтэ үлэһиттэрэ 41 МВТ кыамталаах 112 дизель-генераторы өрөмүөннүөхтэрэ. Ол курдук, өрөмүөн программатыгар 1,656 млрд солк., инвестиция программатыгар 78,5 млн солк. көрүллүбүт. Билиҥҥи туругунан кэккэ нэһилиэктэргэ үлэ күөстүү оргуйар. «Бэрдьигэстээх-Ааһыма», «Бэрдьигэстээх — Орто-Сурт», «Амма-Сулҕаччы», «Сунтаар-Сардаҥа», «Оҥхой-Үөһээ Бүлүү», «Бүлүү-Тоску» хайысхаларынан баар баҕаналары уларыта уонна бөҕөргөтө сылдьаллар. Ыам ыйыгар энергетиктар 13 трансформаторы чөлүгэр түһэрдилэр. Дьокуускайдааҕы ГРЭС-кэ ГТЭ-45-3 газотурбиннай тэрил өрөмүөннэннэ. Бүлүүтээҕи ГЭС 5 №-дээх агрегатын эмиэ кэлэр күһүҥҥэ бэлэмнии сылдьаллар. Дьокуускайдааҕы ТЭЦ-кэ ититии ситимин, тымныы уонна итии уу кэлэр турба боруобаттарын бэрэбиэркэлиэхтэрэ.
«Сахаэнерго» үлэһиттэрэ 86,8 км усталаах ситими өрөмүөннээн, нэһилиэктэргэ СИП-ка көһөрүүнү күргүөмнээхтик тэрийэллэр. Депутатскай ТЭЦ-кэ паар турбинатын, ууну ититэр хочуоллары, ититии ситимин бэлэмнии сылдьаллар. Быйыл Өймөкөөн улууһун Орто Балаҕан, Эдьигээн улууһун Кыстатыам, Кэбээйи улууһун Сэбээн Күөл нэһилиэктэригэр күн күүһүнэн үлэлиир саҥа электростанциялар үлэҕэ киириэхтээхтэр. Сэттэ ыраах сытар хотугу улууска 7,31 МВТ уопсай кыамталаах автоматизированнай дизельнай электростанциялар тутуллаллара былааннанар.
«Теплоэнергосервис» тэрилтэ Алданнааҕы салаатыгар КВТС-20 диэн үс котлоагрегаты, Охотскайга — КВМ-3,5, Уус-Маайаҕа — КВМ-2,5 агрегаттары өрөмүөннээтилэр. Маны таһынан энергетиктар өссө 14 хочуол агрегатын бэлэмниэхтэрэ, Чагда уонна Кутана диэн Алдан дэриэбинэлэригэр баар электростанцияларга үс саҥа хочуолу туруоруохтара.
Киин уонна Арҕааҥҥы электрическэй ситимнэр биригээдэлэрэ быйыл 253,73 км уот ситимин өрөмүөннээтилэр. Былаан быһыытынан 617,6 км оҥоһуллуохтаах. Ону таһынан 400,51 га просеканы ыраастаатылар.
Бу киэҥ далааһыннаах үлэ барыта дьон-сэргэ сылаас, сырдык дьиэтигэр үөрэ-көтө кыстыырын туһугар оҥоһуллар.
Комментарии
Читайте также
Новости партнеров
Больше видео