Күдэйэҕэ долгутуулаах күн
2016-2017 үөрэх дьылыгар Б.Н.Егоров аатынан Күндэйэтээҕи орто агрооскуолаҕа 140 оҕо үөрэннэ. Быйыл 11-с кылааһы 12 оҕо бүтэрэр. Ыам ыйын 25 күнүгэр кинилэргэ тиһэх чуораан үөрүүлээх тэрээһинэ буолла. Оҕолор бары да дьоҕурдаахтарынан сөхтөрдүлэр, үөртүлэр. Ол курдук успуорка да, үөрэхтэригэр да ситиһиилээхтэр. Дэлэҕэ да, кинилэртэн Анатолий Саввинов уонна Айаал Васильев үрүҥ көмүскэ киирсиэхтэрэ дуо? Билигин барытын БКЭ быһаарыаҕ турдаҕаа. Бүтэһик чуораан долгутуулаах тэрээһинигэр улуустааҕы тыа хаһаайыстыбатын управлениетын начаалынньыга Иван Тихонов, үөрэх салаатын сүрүннүүр исписэлииһэ Яков Максимов кытыннылар, үөрэх туйгуннарыгар, актыбыыстарыгар грамотаны, махтал суруктары туттардылар. Үөрэнээччилэрин оскуола дириэктэрэ Маргарита Иванова истиҥ, сылаас тылынан эҕэрдэлээтэ, барыта үчүгэй буоларыгар алҕаата. Оскуола агропрофильнай буолан үөрэнээччилэр дьиэ үүнээйитин үүүннэриинэн, ону сэргэ сибиинньэни көрүүгэ үлэлэһэллэр. Хаһыс да сылын үүнээйини көрүүнэн дьарыктанар «Росточки» диэн лааҕыр үлэлиир. Манна орто сүһүөх кылаас үөрэнээччилэрэ сылдьаллар. Билигин араас үүнээйи арассаадата тахсыбытын бүөбэйдииллэр. Бүтэһик чуораан күнүгэр сөп түбэґиннэрэн, оскуолаҕа саҥа мастарыскыай дьиэтэ аһылынна. Мастарыскыай үс хайысханан үлэлиэҕэ. Ол курдук, бастатан туран, ынах сүөһүнү көрүү-истии, иккиһинэн, араас үүнээйини үүннэрии уонна тыраахтары, массыынаны ыытыыга үөрэнии. Инникитин оҕолор оскуоланы тиэхиньикэни ыытар бырааптаах бүтэриэхтэрэ. Онно бары усулуобуйа баар. Ааспыт сыллаахха оскуола СӨ Тыатын хаһаайыстыбатын министиэристибэтиттэн Грант быһыытынан сабыс-саҥа «Беларусь» тыраахтары ылбыта. Гарааһа мастарыскыайы кытта сыста турар. Билигин өрөспүүбүлүкэ үрдүнэн барыта 96 агро хайысхалаах оскуола үлэлии турар. Улууспутугар оннук 6 оскуола баар. Тыа сиригэр улааппыт оҕо хара µлэни сатыы үөрэниэхтээх, ыарахаттартан чаҕыйыа суохтаах, олоҕун устата көрсөр ыарахаттары чэпчэкитик аһарыныахтаах. Агрооскуолаларга олоххо-дьаһахха, тыа сирин үлэтигэр-хамнаһыгар бэлэм оҕолору иитэн таһаарарга кыһаллаллар. Сүөһүнү иитиигэ быраактыканы барыахтарын сөп. Нэһилиэккэ сүөһүнү иитиинэн утумнаан дьарыктанар «Сырдык аартык» кэпэрэтиип баар. Олор базаларыгар хайа баҕарар үлэлиир кыахтаахтар. Дириэмкэт Маргарита Николаевна эппитинэн, кэлэр үөрэх дьылыгар бу оскуолаҕа 16 оҕо киирэргэ бэлэмнэнэр. Онон Күндэйэ инникигэ эрэллээх, өссө күүскэ сайдарга бэлэм.
