Эдьигээҥҥэ «Лииндэ» хочуолунай үлэтин бэркэ саҕалаата

Быйылгы кыстык сезона ОДьКХ Эдьигээннээҕи Баахынайдааҕы учаастагар хаһааҥҥытааҕар да ураты. Үс ый аннараа өттүгэр манна саҥа котельнай үлэҕэ киирбитэ. Социальнай суолталаах объектары таһынан уонча ыал «Лииндэ» саҥа котельнайга холобонон олороллор. «Саҥа-саҥа курдук, киэҥэ-куоҥа, ырааһа, кыамтата улахана үчүгэй бөҕө буоллаҕа», — диэн үлэһиттэр этэллэр. Олохтоохтор да дьиэлэрэ сылыйан абыраннылар. Котельнай үс оһохтооҕуттан иккитэ толору кыаҕынан үлэлиир, биир саппааска турар. Бу үс ый устата кочегардар саҥа котельнай оһохторун, кыаҕын, үлэлиир ньыматын баһылаан, үөрэтэн кэллилэр. Онон бэйэлэрэ этэллэрин курдук, үлэлииллэр да, үөрэнэллэр да. Тымныы ыйдарга нэһилиэньэҕэ сылааһы биэрэр соруктаах түөрт кочегар: Николай Петров, Владимир Гаврильев, Алексей Руфов, Роман Григорьев, ону кытта икки оттулар чоҕу киллэрэн биэрээччилэр Алексей Ефимов, Анатолий Васильев үлэлииллэр. Мин сылдьар кэммэр Алексей Ефимов үлэтин үгэнигэр сылдьара. Кини саҥа котельнайга быйылгыттан саҥа үлэлээн эрэр. Алексей кочегар күннээҕи оттор чоҕун эт илиитинэн таһан бэлэмнээн биэрэр. Күн устата улахан тымныыларга балтараа тонна чоҕу таһар. Сыралаах уонна ыарахан үлэни Алексей улахан таһаҕас гыммат. «Тугу кэпсиэхпиний, сүктэриллибит үлэбин, эбээһинэспин толоробун», — диэн үлэ киһитэ этэр.