Биир дойдулаахпыт Вячеслав Николаев «Эр киһи бастыҥ оруола» номинация хаһаайына

Мэҥэ-Хаҥалас улууһугар Д.Ходулов аатынан Майатааҕы норуот айымньытын киинигэр СӨ култуура үтүөлээх үлэһитэ, артыыс уонна режиссер Аркадий Новиков аатынан өрөспүүбүлүкэтээҕи киинэ бэстибээлэ буолла. Манна киинэни дьарык оҥостубут анал үөрэҕэ суох дьон, бэйэ үбүгэр устубут киинэлэрин куонкуруһа ыытылынна. Куонкуруска дьүүллүүр сүбэ көрүүтүгэр 2015-16 сылларга уһуллубут 43 киинэ киллэрилиннэ. Документальнай киинэҕэ, уус-уран киинэҕэ, кылгас кээмэйдээх киинэҕэ, мульткиинэҕэ, режиссураҕа, идеяҕа, оператордарга, эр киһиэхэ уонна дьахталларга бастыҥ оруолларга, киинэни муусуканан доҕуһуоллааһыҥҥа бастыҥнары талан анал номинациялар олохтоннулар. Биһиги улуустан Иван Тойтонов 20-с Манчаары оонньууларын спартакиадатын көрсө устубут «Ньукуус уонна Саачык», «Лотерея» киинэлэрин салгыыта кэриэтэ буолбут «Хоһууттар оонньуулара» киинэтэ «Бастыҥ уус-уран киинэ» номинацияҕа кыттыыны ылла. Онтон Ньукуус оруолун толорбут Вячеслав Николаев «Эр киһи бастыҥ оруола» анал аакка тиксэн, намнар, үөһээ бүлүүлэр үөрүүлэрэ улахан буолла. «Киинэ бэстибээлин туһунан телевизорга рекламаны көрбүтүм. Интэриэһиргээн интернетынан «Хоһууттар оонньуулара» киинэбинэн кытынным. Онтон телефоннааннар Вячеславтыын иккиэммитин номинацияҕа киирдигит диэн ыҥырбыттара. Мин үлэбинэн бириэмэ суох буолан, хомойуох иһин, тиийбэтэҕим. Ийэм Зинаида Прокопьевна мин ааппыттан баран көрөн-истэн, номинант дипломун ылан кэллэ», — диэн Иван Тойтонов санаатын үллэһиннэ. Киинэҕэ эр киһи оруолун уһулуччу үчүгэйдик толорбут, анал аат хаһаайына Вячеслав Николаев кэпсиир: «Кэмбиэри арыйан баран ааппын ааттаабыттарыгар, долгуйбутум, үөрбүтүм. Мэҥэ киинэ диэн оскар курдук статуэтка уонна 5 тыһ. солк. суумалаах сертификат туттарбыттара. Бу ситиһии — киинэҕэ уґуллубут дьон, Нам нэһилиэгин бүттүүнүн ситиһиитэ буолар. Барыларын бу ситиһиибитинэн эҕэрдэлиибин! Улахан махталбын Иван Тойтоновка тиэрдэбин. Кини миигин үс киинэ тухары сүрүн дьоруой оҥорон маннык номинацияҕа тигистим. Үстүү-түөртүү сыл тохтуу-тохтуу үс киинэ уһуллубута. Ол тухары уларыйбат эбиккин диир (күлэр). Майаҕа баран кэлэрбэр үлэлиир «Кэнчээри» оҕо саадым олус көмөлөстө. Ккинилэргэ махталбын тириэрдэбин».