Орто Халымаҕа норуот ансаамбыллара ааттарын көмүскээтилэр
Орто Халыма улууһа култуура эйгэтигэр үс норуодунай ааты сүгэр кэлэктииптээҕинэн киэн туттар. Былырыын «Дьүкээбил» үҥкүү ансаамбыла норуодунай ааты ылары ситиһэн, Дьокуускай куоракка отчуоттуур кэнсиэри көрдөрбүттэрэ. Оттон соторутааҕыта «Колымчане» ВИА итиэннэ Орто Халыматааҕы тыйаатыр норуодунай ааттарын туруулаһан, көмүскээн, икки күн устата куорат олохтоохторугар уонна ыалдьыттарыгар бэйэлэрин айар киэһэлэрин бэлэх ууннулар. Бэлиэ тэрээһиннэргэ СӨ култуура уонна духуобунай сайдыы министиэристибэтин «Арктика» тэрилтэтиттэн норуодунай тыйаатырдарга кылаабынай исписэлиис Николай Пономарёв уонна норуот уус-уран айымньытыгар кылаабынай исписэлиис Александра Николаева кэлэн, айар талааннаах дьоммут үлэлэрин сыаналаатылар. Кинилэри кытары дьүүллүүр хамыыһыйаҕа улуус баһылыгын социальнай боппуруостарга солбуйааччы Светлана Третьякова үлэлэстэ. Тыйаатыр бу сырыыга «Мэҥэ халлаан оҕото Манчаары Баһылай» диэн Айсен Дойду дырааматыттан 13 хартыыналаах испэктээкили көрдөрдө. Оруолу толорооччулар сыыс уонна түөлбэ тылы туттубатахтара хайҕанна. Онон тыйаатыр үлэтигэр, чуолаан туруорааччы-режиссёр Ольга Винокурова, тыл күүһүгэр болҕомтону уурара, сөпкө саҥарарга үөрэтэрэ, оруолу толорооччулар эмиэ онтон халбарыйбаттара хайҕабыллаах. Санатан эттэххэ, тыйаатыр 1969 сыл сэтинньитигэр И.Находкин «Улахан доҕор» диэн пьесатынан (режиссёр Е.К.Созонова) Дьокуускайтан кэлбит дьүүллүүр сүбэ хамыыһыйатын иннигэр олохтоох самодеятельность артыыстара норуодунай ааты көмүскээбиттэрэ. Онтон ылата элбэх сыл ааһан, күн бүгүнүгэр диэри улуус култуураҕа биир тутаах салаата буолан, айымньылаах үлэтэ салҕанар. Аны үс сылынан, о.э. 2019 сыллаахха норуодунай тыйаатыр төрүттэммитэ 50 сыллаах үбүлүөйүн бэлиэтиэҕэ. Оттон «Колымчане» ВИА 1980 сыллаахха тэриллибитинэн ааҕыллар. Былырыын 35 сыллаах үбүлүөйүн бэлиэтээн, айар киэһэтин үрдүк таһымҥа тэрийбитэ. Ансаамбыл билиҥҥи салайааччытынан Валентин Лаптев буолар. Ансаамбыл бэртээхэй кэнсиэригэр ырыалар тыыннаах доҕуһуолунан толорулуннулар, муусука хас да үнүстүрүмүөнүгэр оонньоннулар. Ансаамбыл репертуара улахан аҥара олохтоох ааптардар, мелодистар айымньыларыттан турда. Итини сэргэ, кэнсиэр кэмигэр оҕолор хомуска оонньоон көрдөрдүлэр.
