Войти в почту

Анаабырга Олег Туприн сур бөрөнү монтировканан бултаата

Бу күннэргэ социальнай ситимнэргэ бөрөнү монтировканан бултаабыт табаһыт туһунан сурах тарҕанна. Сонуну сиһилии билээри сорсуннаах сонордьуту, байанайдаах булчуту, сатабыллаах табаһыты Олег Туприны кытта кэпсэттим. Бу ый саҥатыгар И.К.Спиридонов аатынан МУТ 1N-дээх ыстаадатын бостууга Олег Спиридонович Туприн сарсыарда табаларын үөрүн буранынан кэрийэ көтүтэн испит. Арай үөр таба быыһыттан улахан атыыр бөрө ойон тахсан куота көппүт. Табалар адьырҕа кыыл баар диэн үргүбэтэхтэриттэн, Олег олус муодарҕаабыт. Чыпчылыйыах түгэнигэр бөрө кутуруга эрэ элэс гынан ааспыт. Бу хас да таба тыыныгар турбут адьырҕа буоларын булчут билбит. Сүтэр, онтон эмиэ күөрэйэн кэлэ-кэлэ ыстаадааны буулаабыта хаһыс да ыйа буолбут. Онон адьырҕа кыылы бултаспатаҕына, кэлиҥҥи өттүгэр өссө охсуулаах буолуоҕун өйдөөн сур сундулуйбут суолун батан, сыыдам көлөтүн гаастаан кэбиспит. Биирдэ өйдөөбүтэ саата-саадаҕа суох, сыгынньах илиитинэн бөрөнү эккирэтэн иһэр эбит. Арай бураанын мууһун тэбиир монтировкалаах уонна быһахтаах эрэ эбит. Нэлэмэн туундара киэҥ туонатыгар булчут уонна адьырҕа куоталаһыыта саҕаламмыт. Араас салаалары быһа көтөн, сис хайалары уҥуордаан, күн киһи оройугар тыгыыта бөрөнү ситэ баттаан, ханна да халбарыйбат гына тилэх баттаһан испит. Субу саба баттаан үлтү тэбистэрэн ааһыах курдук буоллаҕына, кыыла сүүрэн иһэн куттаммыкка дылы буолан, кубулунан кутуругун кумуччу туттар үһү. Арай бөрө эмискэччи сүүрэн иһэн эргичис гынаат, тиистэрин ардьаппытынан бурааҥҥа түһээри дьүккүҥнээбит. Итинник хамсаныы хаста да хатыламмыт. «Сыарҕалаах Махсыым» үрэҕэр бөрөнү эккирэтэн тиийиитигэр, көлөтүн уматыга бүтэн эрэрин бэлиэтии көрбүт. Анарааҥҥыта да сылайан илистибитэ биллибит. Онон хайатын эккирэтиһээ оонньуохпунуй диэн эр санаатын түмэн, бөрө сүүрэн иһэн эргичис гынаат киниэхэ тииһин килэппитинэн ыстаммытыгар, бураанын гаастаат, бөрөнү тиэрэ таһылла түһүөр диэри түҥнэри көтүппүт. Адьырҕа бураан капотун үрдүгэр биирдэ баар буолаат, хаар бурҕачыс гыныар диэри төбөтүн оройунан тиэрэ таһыллыбыт. Олег иккистээн бураанын эргичис гына охсоот, туймааран баһынн илгистэ турар бөрөнү түҥнэри көппүт. Уһуну-киэҥи толкуйдуу барбакка монтировкатын туппутунан, өһөс хаанымсах харахтарынан тобулу көрөн турар адьырҕаҕа субу тиийээт, оройго маҕыйа түһэн баран сырбаппыт. Хаан-сиин биирдэ ыһылла түспүт. Бөрө уота сойон эрэр харахтарын бэлиэтии көрөн, тыынын салҕаан иккитэ күүскэ охсубут. Дьэ, ол кэнниттэн уоскуйан бурааныгар кэлэн олорбут. Кыылы чинчийэн көрбүтэ — үс саастаах эдэр атыыр ааттааҕа эбит. Бураанынан үнтү көтөрүгэр, бамперыгар икки аһыытын тоһуппут. «Ити кэмҥэ номнуо ыстаадаттан икки тыһы табаны тарпыт эбит. Тот буолан ситтэрдэҕэ«, — диэн быһаарар байанайдаах булчут. Олег Спиридонович удьуор табаһыт, кыра эрдэҕиттэн табаһыт сылаалаах үлэтигэр этинэн-хаанынан мускуллан улааппыта. Таба иитиитигэр үлэлээбитэ номнуо сүүрбэттэн тахса сыл буолла. Табаһыттар слеттарыгар күрэхтэүэн араас бириистээх миэстэлэргэ тиксээччи. Алта оҕо амарах аҕата. Олег курдук хорсун-хоодуот табаһыттардаах буоламмыт, Анаабыр туундаратыгар адаар муостаах табабыт чэчирии уонна эбиллэ турар.

Анаабырга Олег Туприн сур бөрөнү монтировканан бултаата
© ЯСИА.RU