Орто Халымаҕа сиринэн сырыы сылын аайы ылыллар болдьоҕо уһатыллар чинчилээх
Сэтинньи 11 күнүттэн 16-гар диэри Орто Халыма улууһугар Арктика уонна хоту улуустарга тирээбит суһал боппуруостары быһаара СӨ Бырабыыталыстыбатын бөлөҕө кэлэн үлэлээн барда. Бөлөх үс хайысхаҕа арахсан үлэлээтэ. Улуус баһылыга Евгений Михайлович Слепцов салайааччылаах бастакы бөлөх Ойуһардаах-Сылгы Ыытар; Тыа хаһаайыстыбатын управлениетын салайааччыта Егор Николаевич Константинов салайааччылаах иккис бөлөх Арҕахтаах-Өлөөкө Күөлэ-Сыбаатай; “Берёзовское” ХП дириэктэрэ Алексей Васильевич Колесов салайааччылаах үһүс бөлөх Хатыҥнаах-Берёзовка сырытта. Бу курдук 7 нэһилиэккэ, олорго баар учаастактарга: Уһун Сирэйгэ, Ойуһарга, Таастаахха, Быталаахха, Дайдылаахха, Тоҥуулаахха, Арыылаахха, Ромаҥҥа, Илин Эбэҕэ, Маһараҕа, Чоҥкуйаҕа тиийэ сырыттылар. Сэтинньи 16 күнүгэр бары улуус киинигэр үлэ түмүгүнэн боротокуолга уларытыылары, этиилэри киллэрии сүбэ мунньаҕар муһуннулар. Бырабыыталыстыба бөлөҕүн, улуус салалтатын кытары көрсүһүүгэ тэрилтэ салайааччылара эмиэ кыттыыны ыллылар. Бу күннээҕи мунньах бэбиэскэтигэр икки боппуруос киллэрилиннэ. Ол курдук Орто Халыма улууһугар 2016-2017 сыллааҕы кыстыгы бигэ туруктаахтык туорааһыны хааччыйыы уонна улуус кииниттэн нэһилиэктэргэ диэри социальнай суолталаах табаардары, таас чоҕу, уматыгы тиэрдии. Бөлөх салайааччыта Михаил Дмитриевич Гуляев: “Улууска буола турар балаһыанньаны кытта миэстэтигэр кэлэн билистибит. Берёзовкаттан ураты нэһилиэктэргэ буранынан сырыттыбыт, хаар халыҥа сорох сирдэргэ 80 см, сороххо — 1,5 миэтирэҕэ тиийэ. Сиэннэр тоҥмокко сүүрэ сыталлар, күөллэр тааҥныыллар. Онон кыһыҥҥы айан суола өтөрүнэн арыллыбат туруктаах. Уопсайынан, айан чааһыгар ыйытыы элбэх. Үөһэнэн сырыыга Берёзовкаҕа атырдьах ыйын бүтүүтэ вертолёт сылдьыбыт, ол кэнниттэн икки аҥаар ый буолан баран бэнидиэнньик күн дьэ көттө. Социальнай суолталаах дотацияламмыт рейстэри толоруу ситэтэ суох диэн бэлиэтиибит. Тыа хаһаайыстыбатын туругун кытта сиһилии билистибит. Нэһилиэктэргэ, учаастактарга дьону, үлэһиттэри кытта көрсөн кэпсэттибит. Билигин Дьокуускайга тиийэн Ил Дархан иннигэр бу сырыыбыт туһунан отчуоттуохпут”, — диэтэ. Быйыл айылҕабыт маннык уһукка тириэрдиэ диэн ким да билбэтэҕэ. Куруук буоларын курдук, алларанан суол ахсынньыга оҥоһуллуох курдук санаабыппыт. Онтубут билигин атыннык эргийдэ. Олунньуга да диэри арыллара саарбах диэн этинээччи үгүс. Бу балаһыанньаҕа, биллэн турар, тиэйии-таһыы боппуруоһа ыар санааны үөскэтэр. Онтон арылыннаҕына даҕаны, ыйтан ордук кэми куоттарабыт, хаалбыт үс ыйга уматыгы, табаары тиэрдэргэ эмиэ уустук. Ол туһунан мунньахха кэлбит салайааччылар эмиэ иһитиннэрдилэр. Оробуочай бөлөх састаабыгар Тыа хаһаайыстыбатын уонна аска-үөлгэ бэлиитикэтин миниистирин солбуйааччы Афанасий Михайлович Семёнов, Тырааныспар уонна суол хаһаайыстыбатын министиэристибэтин департаменын салайааччытын солбуйааччы Алексей Борисович Борисов, РФ Ыксаллаах быһыыга-майгыга министиэристибэтин Саха сиринээҕи кылаабынай управлениетын салайааччытын солбуйааччы Аркадий Филиппович Саввинов, Нэһилиэнньэ сэрэхтээх буолуутун хааччыйар судаарыстыбаннай Кэмитиэт салайааччытын солбуйааччы Марк Романович Харлампьев, Арктика дьыалаларыгар судаарыстыбаннай Кэмитиэт отделын салайааччыта Иннокентий Михайлович Баланов бааллар. Бөлөҕү Спорт миниистирэ уонна Орто Халыма улууһун куратора Михаил Дмитриевич Гуляев салайан илдьэ сырытта.
