Станислав Цюхцинскай: «Дьонум-сэргэм иннигэр андаҕайабын»
Муус устар 20 күнүгэр социальнай-культурнай киин дьиэтигэр оройуон саҥа баһылыгынан талыллыбыт Цюхцинскай Станислав Янович дуоһунаһын тутар үөрүүлээх сиэрэ-туома ыытылынна. Бу бэлиэ күнү олохтоохтор оройуон социальнай-экономическай сайдыытыгар кэскиллээх кэрдиис кэм үүммүтүнэн сыана быһалларыгар дьоһун төрүөт баар. Ол курдук, Арассыыйа бэрэсидьиэнэ Владимир Путин Ыйааҕынан муус устар 21 күнэ дойду үрдүнэн олохтоох бэйэни салайыныы күнүнэн биллэриллэн турар. Онон бу өрө көтөҕүллүүлээх түгэн сырдык сарсыҥҥыга бөҕө-таҕа далаһаны уурда. Тэрээһиҥҥэ баһылык Станислав Цюхцинскай биир дойдулаахтарыгар уйгулаах, нус-хас уонна хаачыстыбалаах олоҕу эрэннэрэр андаҕарын истээри, онно туоһу буолаары ыраахтан-чугастан дьон-сэргэ тоҕуоруста. Сахалыы сиэринэн көрөөччүлэри-ыалдьыттары ыраастаатылар, чороонноох үҥкүүһүттэр дайдылар, алыптаах-аптаах хомус дьүрүһүйдэ. Сценаҕа СӨ бырабыыталыстыбатын чилиэннэрэ Г.П.Левин — СӨ ОДьКХ уонна энергетикаҕа миниистирэ, А.Т.Михеев — СӨ Үлэҕэ уонна социальнай сайдыыга миниистирэ, Е.А.Ильяхова — улуус дьокутааттарын сэбиэтин бэрэссэдээтэлэ, Г.В.Матвеева — оройуон общественнай сэбиэтин салайааччыта, тыа нэһилиэктэрин баһылыктара — В.А.Катанов, О.П.Корякин, Е.Я.Соломонова, В.В.Новиков, Абый нэһилиэгин баһылыгын солбуйааччы М.В.Черемкина уонна Белай Гора баһылыга Н.Н.Новиков тахсаллар. Мустубут дьон истиитигэр территориальнай быыбардыыр хамыыһыйа бэрэссэдээтэлэ Е.П.Новикова 2017 сыл муус устар 9 күнүгэр оройуон баһылыгын талар быыбарга быыбардааччылар Цюхцинскай С.Я. иһин 48,20 бырыһыаны биэрбиттэринэн кини кыайыылаах тахсыбытын этэн туран, баһылык дастабырыанньатын туттарда. Егор Дохунаев алгыһын кэнниттэн үгэһинэн оройуон баһылыгар Станислав Цюхцинскай ийэтэ, үлэ бэтэрээнэ Мария Ильинична уонна Уолбут ытык кырдьаҕаһа Егор Васильевич Жирков сахалыы таҥаһы кэтэртилэр, түмэр уонна сомоҕолуур күүстээх бэлиэни моойго ииллиллэр. Арассыыйа, Саха Өрөспүүбүлүкэтин уонна Абый оройуонун гимнэрэ дуорайар, сценаҕа Абый улууһун (оройуонун) Устаабын таһаараллар. Станислав Цюхцинскай Российскай Федерация Конституциятын, Саха Өрөспүүбүлүкэтин сокуоннарын уонна муниципальнай оройуон Устаабын халбаҥнаабакка тутуһуом уонна олохтоохтор интириэстэрин өрө тутуом, кинилэр кыһалҕаларын быһаарыам уонна олох таһымын үрдэтэргэ туруулаһан үлэлиэм диэн андаҕайда. Бу кэнниттэн оройуон саҥа баһылыгын эҕэрдэлээтилэр. Оройуон дьокутааттарын Сэбиэтин бэрэссэдээтэлэ Елена Ильяхова олохтоох бэйэни салайыныы института таһаарыылаах уонна эффективнэй үлэлээх буолуутугар баһылык уонна дьокутааттар корпустара биир тиһиликкэ уопсай сүбэнэн-быһаарыынан үлэлиэхтэрэ диэн эрэннэрдэ. Общественнай Сэбиэттэн Галина Матвеева ааспыт быыбарга баһыйар куолаһы ылыы дьон-сэргэ итэҕэлин-эрэлин көрдөрөр уонна баһылыкка сүктэриллибит эбээһинэһи кини чиэстээхтик толоруоҕа диэтэ. Майыар национальнай нэһилиэгин баһылыга Виктор Катанов оройуоҥҥа билигин баар уонна үөскүөхтээх кыһалҕалары саҥа талыллыбыт баһылык табыгастаахтык туоратарыгар нэһилиэнньэ саарбахтаабатын тиэртэ. Урукку баһылык Михаил Никулин үлэлээн ааспыт кэмин уратыларын этэн баран оройуон дьоно-сэргэтэ инникигэ дьулуурдара күүһүттэн тирэнэн аҕа баһылыкка дириҥ хорутууллаах үлэни баҕарда. Эҕэрдэ алгыстаах тылларын истэн баран миниистир А.Т.Михеев түмүктүүр кэриэтэ: «Ытыктабыллаах Станислав Янович! Норуот итэҕэлин ылыы бочуоттаах. Онно эн оройуон, өрөспүүбүлүкэ үрдүкү салалтатыгар үлэлээбит уонна онно мунньуммут баай уопутуҥ төһүү күүс буолла, киһи быһыытынан тус хаачыстыбаҥ эмиэ сыаналанна. Мантан тэптэрэн эн биир дойдулаахтарыҥ санааларын истэн, толкуйдарын түмэн күүстээх үлэҕэ көҕүлээн оройуону сайдыы киэҥ аартыгар таһаараргар эппиэтинэһиҥ уонна эбээһинэһиҥ улааталлар. Биһиги, үрдүкү салалта, эйиэхэ эрэлбит күүстээх уонна бу күнтэн саҕалаан биэс сыллаах болдьоххор үлэҥ-хамнаһыҥ үрүлүйдүн, кэрэ кэскил түстэннин!»-диэтэ. Оройуон баһылыга Станислав Цюхцинскай дуоһунаһыгар киирэр сиэрэ-туома М.М.Ефимовка «Гражданскай килбиэн» анал бэлиэни туттарыынан уонна үөрүүлээх кэнсиэринэн түмүктэннэ. 1 из 10
