Войти в почту

Нам улууһун дьаһалтата ХИФУ выпускниктарын кытта көрүстэ

Олунньу 9 күнүгэр «Нам улууһа» МТ баһылыга Александр Атласов, баһылыгы бастакы солбуйааччы Инна Сивцева, улуустааҕы дьиэ кэргэн уонна ыччат управлениетын начальнига Татьяна Степанова, улуус депутаттарын Сэбиэтин председателэ Иван Попов, дьарыктаах буолуу киин салайааччыта Гаврил Николаев, үөрэх управлениетыттан Елена Никитина, «Бизнес инкубатор» директора Алексей Винокуров уонна нэһилиэктэр баһылыктара, тэрилтэлэр салайааччылара Нам улууһуттан быйыл ХИФУ бүтэрээччи студеннары кытта көрүстүлэр. Тэрээһини гуманитарнай үөрэхтээһин уонна корпоративнай политика проректора Надежда Зайкова ыытта. Көрсүһүү УЛК мунньахтыыр саалатыгар буолла, манна үрдүк үөрэх кыһатын кафедратын представителлэрэ, карьера киинин начальнига Александр Индеев, «Импульс» ыччат үлэ биржатын специалиһа Захар Андросов кыттыыны ыллылар. Быйыл Нам улууһуттан университеты бүтэрээччи 117 студент баара бэлиэтэнэр. Көрсүһүүгэ хас биирдии студент инники сыалларын, ханна үлэлии баралларын, ханна дуогабардаахтарын билиһиннэрдилэр. Мустубут студеннартан улахан аҥаара үөрэхтэрин салҕаан магистратураҕа салгыы үөрэнэ хаалар баҕа санаалаахтарын эттилэр. Сорохторо төрөөбүт улуустарыгар үлэ көрдөнөр былааннаахтар, итиэннэ таах олорон хаалбакка республикабыт «тэбэр сүрэҕиттэн” ырааппакка чугас улуустарга да үлэ көрдөнөр санаалаахтарын биллэрдилэр. Үөрэх уонна доруобуйа харыстабылын салаатыгар дуогабардаах оҕолор үлэлииргэ бэлэмнэрин биллэрдилэр. Намнааҕы дьарыктаах буолуу киинин начальнига Гаврил Николаев бүгүҥҥү күҥҥэ тэрилтэлэргэ ханнык үлэ миэстэтэ баарын иһитиннэрдэ, студеннар тустаах дьонноругар ыйытыылары биэрдилэр.

Нам улууһун дьаһалтата ХИФУ выпускниктарын кытта көрүстэ
© ЯСИА.RU