Войти в почту

“Бэйэҥ сэлиэнньэҕэр ыскамыайката бэлэхтээ”

Быйыл Арассыыйаҕа Экология, өрөспүүбүлүкэҕэ Ыччат сылларынан Сунтаардааҕы политехническай лиссиэй омук тылыгар учуутала, Сунтаар нэһилиэгин дьокутаата Сардаана Константиновна Никитина итинник ааттаах бырайыагын олоххо киллэрдэ. Маны лиссиэй дириэктэрэ Олег Константинович Сосин тута биһирээбит уонна бэйэлэрин уустарын кыһатыгар үлэһэн оҥотторбут. Онтон соторутааҕыта, Кыайыы бырааһынньыгын өрөгөйүн үгэнигэр, Ленин болуоссатыгар үөрүүлээх тэрээһин буолла. Лиссиэй тиэхиньикэтинэн 10 ыскамыайканы тиэйэн аҕалан болуоссакка кэчигирэччи уурдулар. Киһи болҕомтотун тардар бары анал суруктаахтар: «Сунтаардааҕы лиссиэй 10 «б» кылааһын кэлэктиибэ», «Дархан» киинэ тыйаатыра, «Предпринимателлэр дьиэлэрэ», «Лиссиэй эдэр үлэһиттэрэ», «Г.С.Егоров» ИП», «Арассыыйа ийэлэрэ» уопсастыбаннай түмсүү», «Сунтаар нэһилиэгин 4-с ыҥырыылаах дьокутааттара», «Сунтаардааҕы ыччат бэлиитикэтин отдела», «Култуура управлениета», «Сунтаар нэһилиэгин бибилэтиэкэтэ» диэн. Олорор сэлиэнньэтигэр биир үтүө дьыаланы атыттарга холобур буолар курдук, саҥа, сонун саҕалааһыны оҥорбут Сардаана Никитинаҕа бары махталбыт улахан. Ити курдук олорор, үлэлиир Сунтаарбыт сэлиэнньэтэ күннэтэ тупсарын, киэркэйэрин, сайдарын туһугар хас биирдии киһи сэмэй кылаатын киллэрсэ турдун. «Улуу Кыайыы 72 сыллаах бырааһынньыгын көрсө биһиги дьоллоох олохпут туһугар олохторун толук биэрбит бэтэрээннэрбит тустарыгар, ытык кырдьаҕастарбытыгар бу ыскамыайкалары бэлэх оҥордубут», – диэтэ Сардаана Константиновна.

“Бэйэҥ сэлиэнньэҕэр ыскамыайката бэлэхтээ”
© ЯСИА.RU