Орто Халыма экологтара сылларын оскуола оҕолорун кытта көрсүһүүттэн саҕалаатылар

Орто Халымаҕа дойдуга биллэриллибит Экология сылыгар анаан Айылҕа харыстабылын инспекциятын кэлэктиибэ оскуолаларга сырыттылар. Кинилэр оҕолорго тулалыыр эйгэҕэ харыстабыл уруоктарын ыыттылар. Тыыннаах айылҕаны харыстыыр санааны иҥэрэр инниттэн инспектордар улууска баар ураты харыстанар сирдэри, онно төрүүр-ууһуур көтөрдөрү, хамсыыр харамайдары, үүнээйилэри хаартыскаларынан көрдөрдүлэр. Онон оҕолор төрөөбүт улуустарыгар ханнык үүнээйилэр, кыыллар, кынаттаахтар Кыһыл кинигэҕэ киирбиттэрин биллилэр. Маны таһынан үөрэнээччилэр викторинаҕа кытыннылар, интэриэһиргиир ыйытыыларыгар сөптөөх хоруйдары ыллылар. Инспекция начаалынньыга Иван Белоногов: „Биһиги үлэбит биир сүрүн хайысхатынан экологическай сырдатыы буолар. Онон, куруук буоларын курдук, үөрэх тэрилтэлэрин кытта ыкса сибээстээхтик үлэлиибит. Оҕо саадын, оскуола үлэһиттэрэ, үөрэнээччилэрэ сылын аайы „Айылҕа уонна мин“, „Экология тиэргэнтэн саҕаланар“ курдук өрөспүүбүлүкэтээҕи куонкурустарга кытталлар, бириистээх миэстэҕэ тиксэллэр. Быйыл даҕаны үгэс буолбут тэрээһиннэргэ бары көхтөөхтүк кыттыахпыт, ону таһынан улууска ылыммыт былааммытынан эмиэ тулалыыр эйгэбит туһугар үлэни дьүккүөрдээхтик ыытарга бэлэммит“, — диэн санаатын СИА-ҕа үллэһиннэ.