Саха Өрөспүүбүлүкэтин Үүнэр көлүөнэтин тус сыаллаах Пуондата Нам улууһун кытта үлэтин салгыыр
Нам улууһугар «Саха Өрөспүүбүлүкэтин Үүнэр көлүөнэтин тус сыаллаах Пуондата» кэммиэрчэскэйэ суох тэрилтэ генеральнай дириэктэрэ Сергей Местников уонна пуонда иһинэн тэриллибит уопсастыбаннай Сэбиэт бэрэссэдээтэлэ Семен Кырбасов, сэбиэт чилиэннэрэ үлэлэрин хайысхаларынан улууска ыытыллар үлэни-хамнаһы, пуонда үбүлээһининэн тутуллубут эбийиэктэри билистилэр. Санатан аастахха, пуонда үбүлээһининэн 1997 сыллаахха 360 миэстэлээх И.Е.Винокуров аатынан Намнааҕы педагогическай кэллиэс үөрэнэр куорпуһа тутуллан үлэҕэ киирбитэ. Онтон 2001 сыллаахха Н.С Охлопков аатынан улуустааҕы гимназия саҥардыллыбыта. 2014 сыллаахха Хамаҕатта нэһилиэгэр «Эрчим» спортивнай саала тутуллан олохтоохтору чөл олоххо угуйа турар. Манна сылдьан үчүгэй көрүүлээхтэрин-истиилээхтэрин, араас улуустан ыччат тоҕуоруһа мустан үөрэнэрин, гимназистар чиҥ билиини ылалларын, олохтоохтор чөл олоххо тардыһалларын көрөн астыннылар, пуонда көмөтүнэн барбыт үлэ үтүө түмүктэрдээҕиттэн үөрдүлэр. Пуонда тутуу эрэ салаатыгар буолбакка, 10 %-нын социальнай хайысхалаах бырайыактарга туһаайар. Ол курдук, оҕо иитэр икки ыалга олохторун, үлэлэрин чэпчэтэр сыалтан от охсор «Синтай» трактор ылалларыгар, сокуоннай саастарын ситэ илик оҕолору көрөр-истэр кииҥҥэ араас туттуллар тэриллэри, Түбэҕэ спорт былаһааккаҕа бүрүөһүн, II Хомустаахха спорт дьиэтэ өрөмүөннэнэригэр, Искраҕа уу кутар массыына ылалларыгар күүс-көмө буолбуттар. Быйыл пуонда Экология сылыгар анаабыт «Сохраним природу вместе» диэн бырайыак-куонкуруһугар Партизан нэһилиэгэ кыттан, кэрэ көстүүлээх Балла күөл туһунан көмүскээн, 300 тыһ. суумалаах грант ылбыта. Салгыы улууска сытыытык турар Намнааҕы оҕо искусствотын оскуолатыгар сылдьан, тирээн турар кыһалҕаны билистилэр. Бу 1955 сыллаах тутуу билиҥҥи ирдэбилгэ сөп түбэспэт. Манна даҕатан эттэххэ, социальнай суолталаах тутууларга өйөбүлү, көмөнү оҥорорун таһынан, пуонда улуус нэһилиэктэрин кыһалҕаларыгар төһүү күүс буолар. Ол курдук, транспорынан анал тэрили хааччыйыыга, спортивнай, оҕо былаһааккаларын тутууга үлэтэ барбыта. Хамаҕатта нэһилиэгэ демографическай көрдөрүүтэ үрдүгүнэн, дьаһалтаҕа Сергей Местников оҕо оонньуур былаһааккатыгар тэрили ыларга сертификат туттарда. Итиэннэ улуус сайдар кэскилин өйөөн, салгыы үлэлэһэргэ дьаһалтаны кытта Сөбүлэҥҥэ илии баттастылар. 1 из 5
